పామో.. దోమో తెలీదు
యాస, టైమింగ్ కలిస్తే ఆ యాక్టర్ అదరగొడతాడు అనడానికి ప్రవీణ్ ఓ ఉదాహరణ. అలాగని కించపరిచేలా అతని యాస ఉండదు. చిన్నబుచ్చుకునేలా ఆహార్యం ఉండదు. సాధారణమైన డైలాగ్ కూడా ప్రవీణ్ నోట వస్తే అది పంచ్ అవుతుంది. వేషం ఏదైనా అందులో కామెడీ మిస్ కాదు. ప్రవీణ్ మార్క్ మిస్ అవ్వదు. కామెడియన్గా ఆకట్టుకుంటున్న ఆయన సెట్లో తన సహనటులతో జరిగిన కొన్ని ఫన్నీ విషయాల గురించి ఇలా చెప్పుకొచ్చారు.
విజయనగరంలో బొబ్బిలిరాజులు కట్టించిన ఓ గెస్ట్హౌస్లో ‘కార్తికేయ’ షూటింగ్ జరుగుతున్న సమయమది. నైట్ టైమ్ జోగినాయుడుని అడివిలో పరిగెత్తించే సీన్ తెరకెక్కిస్తున్నారు. డైరెక్టర్ కట్ చెప్పాడు. కాస్త రీలాక్స్ అయ్యాం. చీకట్లో నా కాలు మీద ఏదో పాకినట్లు అనిపించింది. అది చీమో, దోమో, పామో కూడా తెలీదు. ఒకవేళ పాము అయితే కాలు కదిపితే పరిస్థితి ఏంటి? ఇదే విజయాన్ని అతి భయస్తుడైన జోగినాయుడికి చెప్పా. ఆ మాట పూర్తిగా విన్నాడో లేదో కూడా తెలీదు చీకట్లో నన్నొక్కడినే వదిలేసి అక్కడి నుంచి మాయమైపోయాడు. కాసేపటికి కానీ సెట్లోకి రాలేదు.
అదే ఊళ్లో వంశీగారు ‘సితార’ సినిమా తీసిన కోటలో మరో సీన్ షూటింగ్ చేశాం. రాత్రి తొమ్మిది గంటలకు ఓ సీన్ షూట్ చేస్తున్నాం. అసిస్టెంట్ డైరెక్టర్ ఒకతను వాళ్ల అమ్మగారు చేసిన భోజనం తీసుకొచ్చాడు. అందరూ తింటుండగా పై నుంచి ఓ పసిరిపాము ప్లేట్లో పడింది. అందరి ప్లేట్లు గాల్లో ఎగురుతుంటే.. ఒకయన ‘షూటింగ్ జరుగుతున్నప్పుడు పాము పడితే సినిమా సూపర్హిట్ అంట’ అని విచిత్రంగా మాట్లాడాడు. ఓ పక్క మేం భయంతో వణికిపోతుంటే ఆ సిట్యువేషన్కి సంబంధంలేని అతని స్టేట్మెంట్కి నవ్వాలో ఏడ్వాలో తెలియలేదు.
ఓసారి కృష్ణభగవాన్, ఎమ్మెస్గారు, నేను కూర్చునున్నాం. ఫోన్ రింగ్ అయింది. భగవాన్గారు మాట్లాడిపెట్టేశారు. ఫోన్ ఎవర్రా అని ఎమ్మెస్ అడిగారు. రఘుబాబు అన్నా.... అనగానే విచిత్రమైన ఎక్స్ప్రెషన్తో ఏమన్నాడు అనడిగారు. ‘బృందావనంలో’ నీ క్యారెక్టర్ సూపర్ ఉందంట అనగానే ఓరేయ్ తింగరోడ అందులో నేను చెయ్యలేదురా’... అన్నాడు. వెంటనే కృష్ణభగవాన్గారు అందుకునే బావుందంటున్నాడు అన్నారు. దాంతో నిన్ను భగవంతుడు కూడా మార్చలేడని నవ్వుకున్నారు.
కొందరు డైరెక్టర్లకు నా డైలాగ్ డెలివరీ బాగా నచ్చుతుంది. సీన్కి తగ్గట్టు సింక్అయ్యేలా నేనేదన్నా డైలాగ్ చెప్పి.. అది బావుంటే సీన్లో లేకపోయినా సినిమాలో పెట్టేవారు. అలా ‘కొత్తబంగారు లోకం’లో శ్రీకాంత్ అడ్డాలగారు కొన్ని డైలాగ్లు వాడారు. ‘ప్రపంచంలో ఉన్న వ్యవహారాలన్ని దీనికే కావాలిరా నా యాపారం తప్ప’ అని నేను లైనేసే అమ్మాయి గురించి మాట్లాడుతున్న సందర్భంగా ‘ఓరేయ్ అగాధం బాధపడకురా ప్రతి కుక్కకి ఓ రోజు వస్తాది’ అన్నది దర్శకుడు రాసి డైలాగ్ ఉంటుంది. అక్కడితో కట్ ఈ సీన్కి. దానిని కంటిన్యూ చేస్తూ... చిన్నప్పుడు అమ్మమ్మగారి ఇంట్లో కొన్ని జ్ఞాపకాలు గుర్తొచ్చి.. ‘నువ్వేంట్రా కర్ణంగారి దొడ్లో ఆంబోతులా..’ అని ఒకటి, కొండ చీపుర్లు అమ్ముకునే మోహం ఇదీను అని సరదాగా నేను అన్న డైలాగ్లు అందరికీ నవ్వు రప్పించడంతో సినిమాలో పెట్టారు.
భోజనం సమయంలో.. కృష్ణభగవాన్గారు... ఇలా తింటూనే మా ఊళ్లో ఇద్దరూ... అని గ్యాప్ ఇచ్చారు. ఏమైంది అనేలోపు.. ఇద్దరు పోయారని సంకేతం ఇచ్చారు. మరోసారి నేను అన్నం తింటుంటే నన్ను ఉద్దేశించి ఇలా తింటూనే మా ఊళ్లో ఇద్దరు... అన్నారు.
దానికి సైటైర్గా ఇలా తింటూనే మా ఊళ్లో నలుగురు అని డైలాగ్ కంప్లీట్ చెయ్యలేదు’ నా పంచ్ ఆయనకి అర్థమయ్యి తర్వాతి రోజు నామీద భీభత్సమైన సెటైర్లు వేశారు.
Comments
Post a Comment