ఆ రెండు సమస్యలతో బాధపడుతున్నా!

 

స్టార్‌ కిడ్‌ అంటే.. కెరీర్‌ నల్లేరు మీద నడక అంటుంటారు!

మొదట ఆ నడక నేర్వాలి, నిలవాలి, గెలవాలి!

స్టార్‌కిడ్‌ అయినా సున్నా నుంచి మొదలుపెట్టి, పట్టుపట్టి గెలిచారు కమల్‌హాసన్‌ గారాలపట్టీ శ్రుతీహాసన్‌. నటిగా, గాయనిగా, సంగీత దర్శకురాలిగా తన సత్తా చాటుతున్నారు. లాక్‌డౌన్‌లో శ్రుతీ ఏం చేశారో ఆమె మాటల్లోనే...

నేను ఇండస్ట్రీలో అడుగుపెట్టి పదేళ్లు పూర్తికావొస్తుంది. ఇప్పుడున్న పోటీ ప్రపంచంలో ఓ కథానాయిక పదేళ్లు కొనసాగిందంటే మామూలు విషయం కాదు. ఈ రంగంలో ముందు, వెనక చెడు ఏదో ఒక రూపంలో కూర్చుని ఉంటే, మంచి మాత్రం ఒంటరిగా మన పక్కన ఉంటుంది. అంటే 10మందిలో ఒకరిద్దరు మంచి మనసు ఎదుటివారిని అర్థం చేసుకునేవారు ఉంటారని నా ఉద్దేశం. నా దగ్గర మంచిగా మాట్లాడి.. పక్కకు వెళ్లి ఇంకోలా మాట్లాడిన వాళ్లని చాలామందిని చూశా. మొదటి మూడు సినిమాలకే ఆ విషయాలన్నీ గమనించాను కాబట్టే ఇంతకాలం ఇండస్ట్రీలో ఉండగలిగా. 

తల పొగరు చూడలేదు...

కెరీర్‌ బిగినింగ్‌లో ఎక్కువ కమర్షియల్‌ సినిమాల వైపే అడుగులేశా. నేను ఇండిపెండెంట్‌గా ఆలోచించే అమ్మాయిని. ఆ టైమ్‌లో నన్ను ఎవరూ గైడ్‌ చేయలేదు. ప్రతి చిన్న విషయం కోసం నాన్నని అడగలేను. మొదట్లో    మెయిన్‌ స్ట్రీమ్‌లో ఉండాలనే యాంగ్జైటీతో కమర్షియల్‌ సినిమాలు చేశా. అది పొరపాటని తర్వాత తెలిసింది. అలాగని అక్కడ నాకు చెడ్డ పేరు ఏమీరాలేదు. సక్సెస్‌ వచ్చినప్పుడు ఆనందపడతా. ఫెయిల్‌ అయిన సినిమా గురించి ఆలోచించి బాధపడను. ఎందుకంటే సినిమా సక్సెస్‌ ఒకరి చేతిలో ఉండదు. టీమ్‌ వర్క్‌ అది. నా ఒక్కరితోనే ఫ్లాప్‌ అయిందని నేననుకోను. పరాజయం పాలైన సినిమాలో ఎక్కడ పొరపాటు జరిగిందో చూసుకుంటా. పదేళ్ల జర్నీలో తెలుగు, తమిళ భాషల్లో ఎక్కువ సినిమాలు చేశా. అది కూడా పవన్‌ కల్యాణ్‌, సూర్య, ధనుష్‌, రవితేజ ఇలా చాలామంది హీరోలతో రెండేసి సినిమాల్లో నటించా. ప్రతి ఒక్కరిదీ ఒక్కో స్టైల్‌. వారంతా సక్సెస్‌ఫుల్‌ హీరోలే. వారి నుంచి నేర్చుకోవడానికి చాలా ఉంది. వీరందరి స్టైల్‌ డిఫరెంట్‌ అయినా కామన్‌ క్వాలిటీ మాత్రం ఒకటుంది. స్టార్‌ హీరోలుగా కొనసాగుతున్నా... చేసే పనిలో క్లారిటీ ఉంది. ముఖ్యంగా తల పొగరు ఎవరిలోనూ చూడలేదు. 

ఎమోషన్స్‌ని కవర్‌ చేస్తున్నా... 

నాలో విలక్షణమైన నటి, సింగర్‌, మ్యూజిక్‌ డైరెక్టర్‌ ఇలా చాలా కోణాలు ఉన్నాయని అందరూ అంటారు. మ్యూజిక్‌ వరకూ నన్ను ఎంత ప్రశంసించినా ఆనందంగా తీసుకుంటా. కానీ నటన పరంగా ఇప్పటికీ స్ట్రగుల్‌ అవుతున్నా. నా ఫేషియల్‌ ఫీచర్‌ బాగోలేదా? నా వైఖరి కరెక్ట్‌గా లేదా? అన్నది అర్థం కాదు. ఎవరన్నా చెబితేనే కదా తెలుస్తుంది. హీరోయిన్‌ కావలసిన ఫీచర్స్‌ నాలో ఉన్నాయి. నన్ను ఎలా క్యాస్ట్‌ చేసుకోవాలో, ఎలాంటి క్యారెక్టర్‌కి నేను సరిపోతానో ఇప్పటికీ క్యాస్టింగ్‌ ఏజెంట్స్‌ తెలుసుకోలేకపోతున్నారని నా అభిప్రాయం. అయితే నాలో ఆ అసంతృప్తి ఉన్నా ఈ కెరీర్‌ని చాలా ఇష్టపడతాను. మేమంతా ప్రేక్షకుల చప్పట్ల కోసం పనిచేస్తాం. యాక్టింగ్‌ అనేది డ్రగ్‌ కాదు మార్కెట్‌కి వెళ్లి కొని తెచ్చుకోవడానికి? అదొక సాధన, కష్టపడి సంపాదించుకోవాలి. నటిగా ఎంతో నేర్చుకుని, కోట్లాదిమంది సినీ అభిమానుల మధ్య నటిగా నిరూపించుకున్నా. ఆ విషయంలో మాత్రం ఆనందంగా ఉన్నా. నిజం చెప్పాలంటే యాక్టింగ్‌ అనేది నా జీవితంలోకి అనుకోకుండా వచ్చింది. లైఫ్‌లో నేను చేసిన పెద్ద తప్పు కూడా యాక్టింగ్‌ని కెరీర్‌గా ఎంచుకోవడమే అనిపిస్తుంది. బిగినింగ్‌ నుంచీ ఇప్పటి దాకా ఎమోషన్స్‌ని కవర్‌ చేసుకుంటూనే కొనసాగుతున్నా. నేను స్టార్‌ కిడ్‌నే కానీ.. నేనింకా స్టార్‌ కాలేదని నా అభిప్రాయం.

సంగీతమే నా జీవితం..

సంగీతానికి సంబంధించి ఏ విషయమైనా నాకు చాలా ఆనందం కలిగిస్తుంది. నా శ్వాసలో సంగీతం ఉంది. నటనలో నా ఎమోషన్స్‌ పూర్తిగా బయటకు తీయలేదేమో కానీ సంగీతం మాత్రం నాలో ఉన్న ఎమోషన్స్‌ మొత్తాన్ని బయటకు తీయగలదు. నాకు సంగీతానికి అంతటి అనుబంధం ఉంది. హిందూస్థానీ సంగీతం బాగా నేర్చుకున్నా. వెస్ట్రన్‌ సంగీతంపై ఎక్కువ ప్రయోగాలు చేయాలనుకుంటా. సంగీతమే నా జీవితం. 

ఆ సమస్యతో బాధపడుతున్నా...

నాలో రెండు సమస్యలున్నాయి. ఒకటి ఓవర్‌ యాంగ్జైటీ, రెండోది హార్మోన్లలో సమతుల్యత లేకపోవడం. మామూలుగా నేను చాలా ప్రశాంతంగా ఉంటా. కొన్ని సందర్భాల్లో ఏదైనా వింటే ఓవర్‌ యాంగ్జైటీ ఫీలవుతా. అదే నాకున్న పెద్ద సమస్య. వ్యాయామాల ద్వారా వాటికి మెల్లగా దూరం అవుతున్నా. నెగటివ్‌గా ఆలోచించడం, ఎదుటివ్యక్తిని ద్వేషించడం నాకు నచ్చదు.

 

లాక్‌ డౌన్‌ కుకింగ్‌ టైమ్‌ 

ముంబైలో ఉంటున్నా దక్షిణాది వంటకాలనే ఇష్టపడతా. వంట కూడా బాగానే చేస్తా. వంట నేర్చుకోవడానికి అసలు కారణం ఏంటంటే.. ఓసారి సూర్య సినిమా షూటింగ్‌ కోసం అమెరికా వెళ్లా. అక్కడ ఓ రెస్టారెంట్‌లో నాకెంతో ఇష్టమైన ఇడ్లీ, సాంబార్‌ ఆర్డర్‌ చేస్తే 20 డాలర్లు (అప్పట్లో 1500కు పైగా)బిల్‌ వేశారు. నా కళ్లు గిర్రున తిరిగాయి. ఆ షూటింగ్‌ పూర్తయి ఇంటికి రాగానే వంట మీద బాగా దృష్టిపెట్టా. ఇప్పుడు లాక్‌డౌన్‌ వల్ల వంటింట్లో మరిన్న ప్రయోగాలు చేశా. నేను ఏదన్నా తినాలనుకుంటే ముందు దానిని ఎలా తయారు చేయాలో తెలుసుకుంటా. బెండకాయ పచ్చడి, పప్పు మామిడికాయ, ఇడ్లీ, సాంబార్‌, నూడిల్స్‌, దోశ అలాగే ఇంట్లో రెగ్యులర్‌గా వండే వంటకలు బాగా చేస్తా. దాదాపు 15 ఏళ్ల తర్వాత కాఫీ తాగా. టేస్ట్‌ బాగుంది. కానీ వింతగా అనిపించింది. అందుకే మళ్లీ నా గ్రీన్‌ టీకే ఓటేద్దామనుకుంటున్నా. 

అది అమ్మనే అడగండి..! 

అమ్మ మంచి యాక్టర్‌ అని అందరికీ తెలుసు. నటిగా ఆమెకు ఇంకా భవిష్యత్తు ఉన్నప్పటికీ సినిమాలకు ఎందుకు దూరంగా ఉంటుందో ఆమెనే అడగాలి. అమ్మా, నేను కలిసి నటించే అవకాశం వస్తే ఆనందమే! అది జరగొచ్చు... జరగకపోవచ్చు. ఇక చెల్లి అక్షరాహాసన్‌ విషయానికొస్తే.. నాలాగే ఇండిపెండెంట్‌ అమ్మాయి. ‘షమితాబ్‌’తో మంచి పేరు తెచ్చుకుంది. నా సలహాలు ఏమీ తను తీసుకోదు. నేనూ సలహాలివ్వను. అమ్మ ఏం చెబితే అది చేస్తుంది. నాన్న హావభావాలు తనలో ఎక్కువగా కనిపిస్తాయి. నిజ జీవితంలో నాన్న మంచి స్టోరీ టెల్లర్‌. అమ్మ కూడా బెస్ట్‌ సపోర్టర్‌. వారిద్దరిలో ఉన్న కరేజ్‌ నేనెక్కడ చూడలేదు. 

రెండు జళ్ల శ్రుతీ

లాక్‌డౌన్‌ టైమ్‌లో అసలు ఖాళీగా లేను. మనసంతా మ్యూజిక్‌ చుట్టే తిరిగేది.. పియానోతో రోజుకో ట్యూన్‌ చేస్తుండేదాన్ని. నా మ్యూజిక్‌ రూమ్‌ని శుభ్రంగా సిద్ధం చేశా. అభిమానుల కోసం కొన్ని ట్యూన్స్‌ చేసి, పాటలు పాడి ఇన్‌స్టాగ్రామ్‌లో షేర్‌ చేశా. ఇదే టైమ్‌లో ఓ రోజు రెండు జడలు వేసుకుని పియానో వాయిస్తున్న ఫొటో ఒకటి సోషల్‌ మీడియాలో పోస్ట్‌ చేశా. రెండు జడల శ్రుతీ చాలా బావుందని అభిమానులు కామెంట్లు చేశారు. ప్రస్తుతం నేను చేస్తున్న రవితేజ  ‘క్రాక్‌’, విజయ్‌ సేతుపతి ‘లాభం’ చిత్రాల్లో నా పాత్ర నిజ జీవితంలో నేనెలా ఉంటానో అలాగే ఉంటుంది.